LAOAG CITY – Patien ni Father Arvin Mangrubang iti Iglesia Filipina Independiente nga adda dagiti ghost ken maanomalya a proyekto ti gobierno ditoy probinsya.
Kuna na a kaadoan kadagiti partido a mangipatpatungpal kadagiti proyekto ditoy Ilocos Norte ket papagayam ni Congressman Sandro Marcos.
Inbatad na a no seryoso ti gobierno nga agimbestigar mainaig kadagiti maanomalya a proyekto ti gobierno ket alisto laeng nga ipatungpal.
Nupay kasta, kunana a saan a maliklikan a gapu ta maysa ti kongresista kadagiti annak ti presidente iti pagilian ket adda ti panagamak dagiti mangipatpatungpal ti linteg nga agimbestigar.
Kabayatanna, inpetteng ni Father Mangrubang a mabalin a ti rason no apay a nailatangan ti dakkel a pondo ti distrito ni Congressman Marcos ket tapno usaren para iti pannakapaiget ti political patronage a mapaspasamak ditoy probinsia.
