Pormalen a nagakem ni Commissioner Charlito Martin Mendoza kas mangidaulo ti Bureau of Customs (BOC) kalpasan iti maysa a tawen a panagserbi na kas Commissioner ti Bureau of Internal Revenue (BIR) ken ti ceremonial turnover manipud ken ni outgoing BOC Commissioner Ariel Nepomuceno a nadutokan met kas baro a President ken Chief Executive Officer (CEO) ti Bases Conversion and Development Authority (BCDA).
Iti inaugural address-na, nagkari ni Mendoza, a dinutokan ni Presidente Ferdinand Marcos Jr. ken nagsapata idi Nobiembre 13—nga ituloy ken papigsaen dagiti reporma iti ahensia kas ti panagkissay iti red-tape, paunegen ti digitalization, panagikkat kadagiti kurakot nga empleado ken panangpaalisto iti cargo clearance para iti agpada a commercial shipments ken balikbayan boxes dagiti overseas Filipinos.
Kas panagsagsagana iti P1.074-trillion revenue collection target ti Bureau of Custome iti 2027, nagpanawagan ti opisial ti naig-iget a koordinasion kadagiti District Collectors tapno tingitingen ti koleksion da ken masungbatan ti aniaman a problema iti operasion.
Nangipaay pay ni Mendoza ti direktiba a paigetan ti panagbantay ken panangipatungpal ti linteg kontra iti amin a klase ti smuggling, kangrunaan na ti iligal a panagiserrek kadagiti produkto a pang-agrikultura
iti pagilian.
Maipalagip a nagserbi pay ni Mendoza kas Undersecretary for the Revenue Operations Group ti Department of Finance (DOF) ken District Collector ti Port of Cebu manipud 2019 agingga iti 2022, no sadinno a naartapan na ti 2020 revenue target kabayatan ti pandemia ken nagbalin nga umuna a Bureau of Customs (BOC) collection district a nakagun-od ti ISO 9001:2015 certification.
Malaksid iti daytoy, iti met babaen ti panangidaulo na iti Bureau of Internal Revenue manipud Nobiembre 2025 agingga ti Nobiembre 2026, inpatungpal ti abogado ken licensed geodetic engineer ti BIR DARES reform agenda, digital transformation, ken pinaigetan na ti kampania kontra iti tax evasion.












