Nakaapektar ti addang ti gobierno a nangipawil ti pannakaiserrek ti imported pork iti uneg ti 60 nga aldaw iti supply ti karne ti baboy ditoy pagilian.

Segun iti US Department of Agriculture Foreign Agriculture Service, ti dua a bolan a pannakasuspenso ti pagangkat ti karne ti baboy ket dakkel ti agbalin nga epekto na iti umuna a kwarter ti 2027, aglalo iti panangrugi ti Enero agingga iti nasapa a paset ti Marso.

Namnamaen ti USDA a bumaba ti imports iti umuna a kwarter iti 94,029 a metriko tonelada nga average a nakita iti umuna a tallo a bolan ti tawen 2025 ken 2026.

Iti patta-patta ti international agency, nakakonsumo ti Pilipinas ti karne ti baboy iti agarop 430,000 a metriko tonelada iti umuna a kwarter ti 2026.