LAOAG CITY – Balligi ti pannakaisayangkat ti coastal clean-up activity iti paset Brgy. 60-A Caaoacan ditoy siudad ti Laoag.
Segun ken ni Liga ng mga Barangay President Rbee Ablan a ti nadaldalus a coastal ket magun-od babaen ti panagtitinnulong dagiti tattao nga adda iti uneg iti komunidad a mangaramid iti aksion wenno tignay.
Kunana a kas paset iti selebrasion ti maika-37 a tawen iti National Statistics Month ket nabibinnulig ti Provincial Government of Ilocos Norte, Environment and Natural Resources Office, City Government of Laoag, nga babaen ti City Environment and Natural Resources Office tapno buklen ti aktibidad a napauloan iti “Ridge, River to Reef” (R2R) Initiative Coastal Clean-Up and Tree Growing Activity iti Barangay Caaoacan babaen iti panangidaulo ni Brgy. Chairman Adel Boy Quinto.
Segun kenkuana a ti aktibidad ket nagbibinuligan pay dagiti nagduduma nga ahensia ti gobierno, uniformed personnel, civic organizations, economic institutions, private partners, barangay officials, 4Ps beneficiaries ken community volunteers.
Inbatad na a daytoy nga aktibidad ket narugyanan babaen iti pannakaisayangkat iti Zumba session, a pinasarunwan ti coastal clean-up ken ti pannakaimula ti talisay tree tapno mapapigsa ti coastal vegetation ken mapapintas ti environmental resilience.
Naamoan a dagiti partisipante ket nakipagpaset pay iti orientation iti tree planting demonstration ken panangipaay ti namnama a dagitoy ket agtultuloy a pannakaipaay ti umno a serbisio iti panagtagiben iti aglawlaw.
Kabayatanna, nangipaay met ti mensahe iti panangsuporta ni Ilocos Norte Governor Cecilia Araneta-Marcos nga inrepresentar ni Board Member ken Liga ng mga Barangay President Ryan John Pascua, idinto nga inrepresentar ni Sangguniang Kabataan President Rionell Respicio ti city government of Laoag.
Inbatad na a babaen kadagitoy nga aktibidad a maisaysayangkat ditoy siudad ket maipasigurado ti panangpatalinaed iti kinadalus ti aglawlaw.












