LAOAG CITY – Possible a nabukel ti rikna ken panunot dagiti estudyante iti University of the Philippines, Diliman, Quezon City, ti panagbalin da a rebelde.
Daytoy ti reaksiyon ni Mr. George Paul Guererro, maysa a nagturpos iti kurso a Pilosopiya iti University of the Philippines, Diliman, Quezon City.
Kuna na nga idi 90’s kas maysa nga estudyante iti nasao nga unibersidad, adda dagiti nakitkita na a saan nga estudyante iti UP a makisarsarita kadagiti estudyente kangrunaan iti Palma Hall ti nasao a pagadalan.
Segun kenni Guererro, possible a nagbalin a rebelde babaen ti pannakaallukoy dagiti estudyante.
Inbatad na a nawaya a makastrek dagiti sabsabali a tattao iti unibersidad iti dayta a panawen.
Inbunannag ni Guererro a naminsan a naayaban nga agdengngeg iti lecture dagiti maipagarup nga agal-allukoy nga agbalin a rebelde.
Nupay kasta, nagkedked daytoy gapu ta saan na a kayat ti umatendar ken adda ti trabaho na idi isuna ti agad-adal.
Maysa kadagiti prosesso a naamuan ni Gererro, ilawlawag dagiti recruiter ti pakasaritaan ti pagilian iti sabali a wagas, sumaruno iti pannakaallukoy dagiti maseknan ken maipan da iti sabali a lugar.
Dagitoy ket indoctrination, inculturation ken immersion.
Inlawlawag na a nalaing dagiti para allukoy gapu ta puntirya da ti emosyon dagiti estudyante tapno makikappeng da kadakuada.
Innayon ni Guererro a ti lugar dagiti agal-allukoy kadagiti estudyante ti UP ket kadagiti kakayoan a paset ti unibersidad iti kallabes.
Para kenkuana ket rumbeng a mabantayan babaen kadagiti otoridad ti UP ngem masapul a saan da a salungasingen ti basic freedom of student ken ti mismo nga unibersidad.
