LAOAG CITY – Kinumpirmaran ni Mrs. Leonora Escarda, ti Municipal Agriculturist iti ili ti Badoc nga adda dagiti mula iti kataltalunan iti nasao nga ili a nadadael gapu iti panagtudtudo na iti kallabes.
Segun kenkuana, iti monitor da ket adda ti pito nga ektarya a namulaan ti mais, 30 nga ektarya a namulaan ti lasona ken 50 nga ektarya a namulaan ti pakwan ti nalayos iti nasao nga ili.
Nupay kasta, kuna ni Escarda a dagiti sumagmamano a nalayos a mula ket adda ti posibilidad na a makarekobre ngem ad-ado dagiti saanen a makaungar pay.
Inbatad ni Escarda nga adda dagiti mapan agkidkiddaw kadakuada ti bukel a maimula, ngem adda met dagiti agrekreklamo nga awanen ti magatang da nga ibunubon da.
Kabayatanna, inpakaammo ni Escarda a kadagiti kayat na ti agmula ti pagay ket adda pay ti irik iti opisina da a mabalin nga ibunubon dagiti maseknan.
