LAOAG CITY – Umabot ti 1,841 nga indibidual ti nakaawat ti tulong manipud iti Department of Social Welfare and Development iti babaen ti programa nga “Assistance to Individuals in Crisis Situation” wenno AICS.
Segun ken ni Mrs. Rochelle Gajes, Officer in Charge iti Provincial Social Welfare and Development Office, ti pondo a nausar ket kiniddaw ti gobernador iti nadakamat nga ahensia.
Innayon ni Gajes a tallo ribo a pisos ti naipaay iti tunggal benepisiaryo.
Mainaig iti daytoy, agdagup ti lima a milyon, lima gasut duapulo ket tallo ribu a pisos ti naipaay iti ili ti Currimao ken Pinili.
Inlawlawag na a walo gasut ket maysa dagiti benepisiario ti ili a Pinili ken naiyawat ti nasao a tulong iti Brgy. Capangdanan idinto a sanga ribu ken uppat a pulo dagiti nabenipisiaran iti ili ti Currimao ken naawat da met ti nasao a tulong iti covered court ti Brgy. Torre iti nadakamat nga ili.
Kuna ni Gajes a dagiti naipaayan ti tulong ket karaman kadagiti umili a nakana a naapektaran iti iduduprak ti bagyo Julian.
Kabayatanna, inpakaammo ti gobierno probinsial a mabalin nga agkiddaw dagiti benepisiario ti nayun a tulong kangrunaan na no adda iti pakainaigan ti agrikultura, livestock, bassit a negosio wenno nayun a pamastrekan.
Kunana a sidadaan ti Agri Ka Dito program a pangidanonan dagiti maseknan iti ania man a kiddaw dagitoy.
