LAOAG CITY – Inpakaammo ni Mr. Jessie Patoc, maysa kadagiti mangngalap iti Brgy. Metro Lapaz ditoy siudad ti Laoag a dumanon iti 30 agingga 100 nga ikan ti matmatay iti inaldaw kadagiti fish cages-da.
Segun kenkuana, daytoy ket kalpasan iti agtultuloy a panaglibeg ti danom iti karayan a mangitunda ti pannakatay dagiti tarakenda a pupok nga ikan.
Gapu iti daytoy, inbatadna a kumarkaro iti agdama situasionda gapu ta arig ket in-inoten a maib-ibos dagiti tarakenda nga ikan banag a dakkel a padagsen kadakuada.
Inlawlawagna nga adda ti immay nangkita kadagiti fish cages-da manipud iti lokal a gobierno ngem awan pay ti naawatda a tulong.
Innayonna a dakkel a parikot daytoy kadakuada kas mangngalap nangruna ket isu ti kangrunaan a pagbiaganda.
Immuna iti daytoy, adu dagiti mangngalap iti nasao met laeng a barangay ti naproblemaan kalpasan a nagsasaruno a natay dagiti tarakenda a pupok nga ikan gapu iti maipagarup a pannakaiwayat ti quarry operation iti lugar.
