LAOAG CITY – Natay ti agarup 30 nga indibidual kalpasan a bimtak ti fuel tanker idiay Nigeria.
Daytoy ket kalpasan a napukawan ti kontrol ti manibela ti lugan.
Nagal-alisto a napan nagkolektar dagiti residente ti gas manipud iti bimmaliktad a tanker ngem kellaat daytoy a bimtak a nangitunda ti dakkel nga apoy a nakauraman dagitoy.
Saan a bumaba iti 40 dagiti nasugatan nga indibidual gapu iti insidente a naitaray dagitoy kadagiti kaasitgan nga ospital para iti pannakatamingda.
Napasamak ti insidente iti Essan ken Badeggi iti paset ti Bida-Agaie road iti Katcha Local Government Area ti Niger state.
Inrakurak ti National Emergency Management Agency a saanda pay a makumpirmaran ti eksakto a bilang dagiti indibidual a karaman iti insidente.
Indanon ni Niger State Governor Mohammed Umaru Bago ti pannakipagladingitna kadagiti maseknan a pamilia dagiti biktima no sadinno nga inladawanna a makapadanag ti pasamak.
Naammoan a ti tanker nga addaan ti karga a petroleum products manipud iti Lagos iti abagatan ti Nigeria nga agturong iti amianan ket nadesgrasia gapu iti saan a napintas a sasaaden ti kalsada.
Mainaig iti daytoy, dagiti naalas a kalsada ti kangrunaan a mangituntunda ti road accidents iti nasao a pagilian.
Maipalagip nga idi Oktubre iti napalabas a tawen, bimtak ti fuel tanker a nakatayan ti 153 nga indibidual iti Jigawa state, north-west Nigeria idinto nga idi Enero ita a tawen, maysa a truck nga addaan ti karga nga 60 a ribu a litro ti petrol ti nagbaliktad iti Suleja pakairamanan ti Niger state a nakatayan ti 86 nga indibidual ken nakasugatan ti 70 a dadduma pay.
