LAOAG CITY – Umabot iti uppat a pulo ket maysa a milyon, innem a gasut pitopulo ket walo ribu innem a gasut tallopulo ket siyam a pisos (41,678,639) ti “total sales” ti Ilocos Norte iti 34th Philippine Travel Mart a naisayangkat idiay SMX Convention Center Manila, Mall of Asia Complex, Pasay City.
Segun iti Ilocos Norte Tourism Office wenno INTO kaipapanan daytoy a ngimmato iti innem a milyon a pisos no maidasig iti napalabas a tawen 2023.
Daytoy ket agsipud ta naaddaan ti probinsia iti total sales a tallopulo ket lima a milyon lima gasut uppat a pulo ket uppat a ribu siyam a gasut pitopulo ket dua (35,544,972) a pisos itay napalabas a tawen 2023.
Kaipapanan daytoy a ngimmato ti sales ti Ilocos Norte iti sangapulo ket pito punto duapulo ken innem a porsiento ita a tawen 2024 no maidasig iti kallabes a tawen 2023.
Inlawlawagda a ti nasao a “sales” ket manipud iti “bookings” dagiti masansan nga umay pumaspasiar ditoy probinsia kangrunaan na iti grupo dagiti agkakapamilya, agpapagayam a mangibilang iti probinsia a modelo a destinasyon dagiti kas kadakuada a pagaayatda ti maaddaan ti naidumduma a padas.
Malaksid iti daytoy, rumrummuar nga inpamatmat dagiti eskuela ti suportada iti kaadu dagiti naorganisar nga “educational tours.”
Mainaig iti daytoy, impadanon ni Gob. Matthew Marcos Manotoc ti napalaus a panagyamanna kadagiti agtultuloy a mangpilpili iti Ilocos Norte a pagpasiaran ken pangbuklan iti naidumduma a padas.
Inpatalgedna iti naragsak a pannakapasangbay kadagiti umay a sangaili ditoy probinsia.
