LAOAG CITY – Inpakaammu ti deputy civil aviation minister ti India nga agarup sangaribo nga hoax bomb threat ti naawat dagiti kompania ti eroplano ken eropuerto ti India ita a tawen.
Kinuna ni Murlidhar Mohol, daytoy ket dandani 10 a daras nga ad-adu ngem dagiti pangta a naawat da idi 2023.
Naammuan a nasurok a 500 kadagiti pangta ita a tawen ti naawat iti maudi laeng a dua a lawas ti Oktubre.
Segun kadagiti kompanya, ti nakaru a panagadu dagiti pangta ti mangitantantan kadagiti eskediul a flight ken mangbalbalkot ti panagbuteng kadagiti pasahero.
Nakairekord met dagiti otoridad ti 256 a reklamo ken 12 a tattao ti naarestar mainaig kadagiti nasao a pangta, ken iti agdama ken agtultuloy ti imbestigasyon da.
