LAOAG CITY – Natay dagiti agina a Pilipino kalpasan a dinungpar ti maysa a pick-up truck ti nagluganan da a kotse iti paset ti Piilani Highway idiay Maui, Hawaii.
Binigbig ni Bombo International Correspondent Manny Pascua idiay Hawaii dagiti natay nga agina a da Mildred Jodenal, agtawen ti 49 ken ti agtawen ti 14 nga anak na.
Segun ken ni Pascua, dagiti agina nga Jodenal ket taga San Esteban, Ilocos Sur ngem agdama da nga agnanaed idiay Maui.
Inbatad na a ti ina nga Jodenal ket agpapaay kas housekeeper iti maysa nga hotel idiay Maui.
Innayon na a napasamak ti insidente kabayatan ti panagawid dagiti agina.
Iti imbestigasyon, nakumpirmaran a ti driver ti truck ket positibo a nakainom ti nasanger.
Inpakaammo ni Pascua a natay a dagus ti ina nga Jodenal idinto a natay bayat a maag-agasan iti ospital ti anakna gapu kadagiti sinagaba da a nakana a sugat.
Immuna ti daytoy, pinirmaan ni Governor David Ige ti paglintegan a maipangato agingga iti sangaribo a dolar ti multa dagiti matiliwan nga agmaneho a nakainom ti nasanger.
