LAOAG CITY – Inbatad Mr. Adreanne Pagsolingan, Information Officer II ti Office of the Civil Defense (OCD) Region I, nga agtultuloy panagmonitorda kadagiti posible nga epekto ti ti Bagyo Kristine iti Rehion 1.
Segun kenkuana, agtaltalinaed a silulukat ti komunikasion iti Regional Disaster Risk Reduction and Management Council I para kadagiti emergency responses ti nagduduma a probinsia ken lokal a gobierno.
Kinunana a nakasagana ti nagduduma a Provincial Disaster Risk Reduction and Management Offices (PDRRMO) ken Local Disaster Risk Reduction and Management Offices (LDRRMO) iti intero a rehion nga agresponde kadagiti maapektaran nga umili.
Inpakaammona nga iti agdama ket awan pay dagiti naawatda a kiddaw a kanayonan nga equipment wenno kanayonan a personnel ngem nakasagana dagitoy a mangipaay iti ania man a kasapulan a tulong.
Mainaig iti daytoy, agtaltalinaed nga awan ti ania man a nairekord a casualties ngem adda dagiti nairekord a pangreggaay ti daga iti Pancian Road iti ili ti Pagudpud iti probinsia ti Ilocos Norte.
Nupay kasta, nangisayangkat ti Department of Public Works and Highways (DPWH) ti clearing operation tapnu madaliasatan met laeng daytoy.
Malaksid iti daytoy, agtultuloy ti panagiwayatda ti Pre-emptive Evacuation kadagiti susceptible areas kas iti Brgy. Mindoro iti Bangar, La Union, iti ili ti Bacarra, Alaminos, Dagupan City, Suyo, Ilocos Sur, Brgy. Pancian ken Brgy. Paselng iti ili ti Pagudpud.
Innayonna a nakasagana met ti Department of Social Welfare and Development (DSWD) Field Office I a mangipaay kadagiti family food pack kadagiti maapektaran ti nadakamat a Bagyo.
Kabayatanna, nagpalagip ni Pagsolingan iti publiko nga agbalin a naalerto kadagiti posible nga epekto ti Bagyo Kristine ken surotenda dagiti pagalagadan dagiti lokal a gobierno, pakairaman ti pre-emptive evacuation.
