LAOAG CITY – Inpakaammo ni Ms. Myles Castillo, Bombo International News Correspondent idiay Indonesia a natiliw ti dati a Bamban, Tarlac Mayor a ni Alice Guo iti maysa nga apartment iti Banten, Tangerang idiay Indonesia.
Segun kenkuana, mamati isuna a babaen kadagiti kaarruba ni Guo iti nagtalinaedanna nga apartment a naglemmenganna ket isu ti nangi-report kadagiti Indonesian authorities.
Inbatadna nga adu dagiti nakigtot a tattao nga agnanaed iti asideg mismo iti temporario a nagtarusan ni Guo.
Inlawlawagna a manarimaan ti pannakikoordinar dagiti otoridad idiay Indonesia iti National Bureau of Investigation para iti al-alisto a pannakaisubli ni Guo ditoy pagilian.
Maipalagip a maikonkonektar iti iligal nga operasion iti Philippine Offshore Gaming Operations (POGO) ni Guo ken manarimaan ti pannakaiwayat ti imbestigasion daytoy iti Senado.
