LAOAG CITY – Mapadayawan kas Honorary Public Servant of the Year – Excellence in Governance and Strong Institutions ni Assistant Sec. Gervy James Gumarit, Commissioner, National Youth Commission for Luzon iti 10th Nation Builders and MOSLIV Awards.
Daytoy a prestihioso a pammigbig ket maipapaay kadagiti indibidual a mangipampamatmat ti napintas a liderato, dedikasion iti serbisio publiko ken napnoan kaipapanan a kontribusion iti nation building ken iti panagdur-as ti komunidad.
Mainaig iti daytoy, inpadanon nga insigida Gov. Cecilia Araneta Marcos ken ni Vice Gov. Matthew Marcos Manotoc ti panangkablaawda ken ni Gumarit a nagserbi iti Provincial Government of Ilocos Norte kas mangidadaulo iti Communications and Media Office.
Dakkel ti pammatida nga agserbi nga inspirasion dagiti umili ti kinapudnona a mangannong iti naipaay kenkuana a responsibilidad.
Naikeddeng a maiyawat ti nasao a pammadayaw ken ni Gumarit iti masungad nga Abril 22 iti agdama a tawen idiay Okada Grand Ballroom, Okada Manila.
