LAOAG CITY – Saan pay nga insubmitir ni dati a presidential spokesperson Harry Roque ti counter-affidavit-na iti qualified trafficking complaint a naipila kontra kenkuana iti Department of Justice (DOJ) kalpasan a nag-no-show wenno saan a timmabuno iti preliminary investigation a naisayangkat idi Lunes, Nobiembre 18.
Segun ken ni Department of Justice prosecutor Eugene Yusi, immuna a napakaammuan ni Atty. Roque mainaig iti preliminary investigation ken ti reklamo kontra kenkuana.
Inlawlawag ti piskal a no saan nga agparang wenno makipaset ni Roque iti preliminary investigation ket saan a masolbar ti reklamo basar iti ebidensia a naipila iti reklamo.
Ngem segun ken ni Atty. Roque awan pay ti naawat na a kopia ti reklamo ken kunana ken awan ti summon manipud iti Department of Justice.
Maipalagip a nagramut ti reklamo kontra ken ni Roque kalpasan a nangipila dagiti otoridad idi Oktubre iti supplemental complaint affidavit kontra iti dati a presidential spokesperson a nakairamananna iti immuna a reklamo iti trafficking kontra ken ni Cassandra Li Ong, ti authorized representative ti na-raid a POGO hub a Lucky South 99 idiay Porac, Pampanga ken dadduma pay.
Ngem immuna nga inlibak ni Roque daytoy a pammabasol kenkuana.
