LAOAG CITY – Inpasingked ni Mayor Aldrin Garvida nga awan ti rumbeng a pagdanagan dagiti residente iti ili ti Nueva Era.
Daytoy ket kalpasan ti napasamak nga engkwentro iti nagbaetan ti Philippine Army ken dagiti kameng ti New People’s Army iti kabanbantayan a paset ti Barangay Poblacion iti nasao nga ili.
Segun kenkuana, adda ti naiget a pammilinna kadagiti otoridad a siguradoen a mabantayan a naimbag dagiti umili tapno awan ti mapasamak a dakes kadakuada.
Inbatadna a nagturong pay isuna a mismo iti nasao a lugar tapno maammoan ken maimatangan ti agdama a kasasaad dagiti residente.
Inlawlawagna nga isolated case laeng ti napasamak ngem inpasiguradona ti rumbeng latta a panangipaay ti seguridad kadagiti umili.
Kunana a naiget pay ti pannakikammayetda kadagiti otoridad ken barangay officials tapno mapagtalinaed ti linak, urnos ken talna.
Maipalagip a nagpaot ti engkwentro iti nagbaetan ti Philippine Army ken dagiti rebelde a grupo iti uneg ti 15 a minuto.
Immuna iti daytoy, inalay-ayan ni Gov. Matthew Marcos Manotoc ti panagamak ti publiko seknan iti nasao a pasamak.
