LAOAG CITY – Manamnama a maipila intono bigat ti reklamo kontra ken ni Nancy Batangan, agtawen ti 42, taga Barangay San Marcelino iti ili ti Dingras.
Daytoy ket kalpasan a naarestar iti entrapment operation ditoy ciudad ti Laoag gapu iti panaglabsing na iti Republic Act (RA) 9485 wenno Anti-Red Tape Act of 2007.
Inlawlawag ni Police Major Joseph Baltazar, ti chief of police iti ili ti San Nicolas, nagpatulong iti opisina da ti maipagarop a nagbalin a biktima ni Batangan a taga Barangay Cacafean iti ili ti Marcos gapu iti panangluko kenkuana ti suspek.
Inbatad ni Baltazar a basar iti palawag ti saanen a nainaganan a biktima, nagam-ammo da iti suspek iti Department of Foreign Affairs (DFA) iti dakkel a mall iti ili ti San Nicolas idi mapan koma mangala ti pasaporte na.
Ditoy nga indiaya ti suspek a tulungan na laengen daytoy a mangiproseso ti pasaporte na ket immannugot met ti biktima.
Malaksid iti pannakaiproseso ti pasaporte, inallukoy pay ti suspek ti biktima a tulungan na daytoy a mapan agtrabaho idiay Saudi Arabia.
Naamoan nga adda ti dinawdawat a kwarta ti suspek iti biktima ngem saanen a nailanad pay no manu amin ti naited na.
Nupay kasta, kalpasan ti agarop innem a bolan ket saan met laengen nga ited ti suspek ti pasaporte ti biktima isut gapuna a nagkamangen daytoy iti PNP.
Iti pannaka-arestar ti suspek ket naamoan a saanna pay a narugyan nga inproseso ti pasaporte ti nasao a biktima.
Rumrumuar nga adda pay dagiti dadduma a nagbalin a biktima ti suspek ken saan nga agpapada ti dawdawaten na kadagiti narecruit na.
Nagtalinaed ti suspek iti kustodyar ti PNP iti ili ti San Nicolas.
