LAOAG CITY – Nabagkong ti maysa a babai kalpasan a binagaanna ti suspek nga ikapsot ti volume ti videoke iti Sitio Uno, Brgy. 37, Calayab ditoy siudad ti Laoag.
Nabigbig ti biktima nga agtawen iti 47, awanan asawa, business owner idinto a nabigbig met ti suspek nga adda iti umno a tawen, awanan asawa ken agpada a residente iti nasao a lugar.
Basar iti Laoag City Police Station, agarup ala una ti parbangon idi Oktubre 10, nagturong ti biktima iti pagtaengan a manarimaan ti panag-videoke-da tapno ikapkapsot ti videoke gapu ta makaistorbo kadagiti kaarrubada.
Gapu iti daytoy, nakaunget ti suspek ket napanna kinomprontar ti biktima agingga a nagbinnara dagitoy.
Timmalaw ti suspek ngem idi nagsubli ket adda ti iggemna a natadem a banag nga isu ti inusarna a nangbagkong iti biktima iti sumagmamano a daras.
Naammoan nga adda ti dua a saksi ti naganawa iti suspek a dagus met a naitaray ti biktima iti Laoag City General Hospital para iti pannakataming dagiti sugat iti nagduduma a paset ti bagina.
Nupay kasta, naiyakar ti biktima iti Mariano Marcos Memorial Hospital and Medical Center iti siudad ti Batac.
Kabayatanna, bayat a maisursurat daytoy a damag ket manarimaan a birbiroken dagiti otoridad ti suspek a dagus a naglibas kalpasan ti insidente.
