LAOAG CITY – Insigida nga inpeksa ni Gov. Matthew Marcos Manotoc ti nabara a panangablaaw na kadwana dagiti opisyal ti probinsya ti Ilocos Norte iti baro a Chief Justice (CJ) ti Supreme Court (SC) a ni Diosdado Peralta.
Segun ken ni Manotoc a nakabakasyon ita idiay New Zealand, dakkel a pakaidayawan ti probinsya ti panagbalin a mangidaulo iti kangtwan a korte ditoy pagilian ni Peralta.
Iti sabali a bangir, inbaga met ni Mrs. Catalina Madarang Peralta a no sibibiag koma pay laeng ti asawa na a ni dati a Digos City, Davao del Sur ken Manila Court of First Instance Judge Elviro Lazo Peralta ket nalablabes koma pay ti marikna na ngem iti marikrikna na kas maysa nga ama.
Kuna na a kadwa na koma ti asawa na iti panangrambak da ti ballaigi a nagun-od ti anak da uray naggapu da iti rigat ti panagbiag ket nakabaelan da iti rimmang-ay babaen ti tulong ti Diyos ken ti panagpabalin na a disiplinado.
Nalagip ni Mrs. Peralta ti natayen nga asawa na a no idi ket iyabogadwan na dagiti marigrigat ket saan a dumawdawat ti “acceptance fee” ken saan nga dumaw-dawat ti dadakkel a pagbayad ken makaumanayen ti manok ken saba.
Inlawlawag pay ni Mrs. Peralta a nagpadesisyonan da nga agasawa a masapul a pagbasaen da ni CJ Peralta para iti napinpintas a masakbayan na ken ti buklen na a pamilya.
Agingga kadagitoy ket maiyarig nga adda ti pamilya Peralta iti rabaw ti ulep gapu ta saan pay a nagmawmawmaw kadakuada ti nagun-od a ballaigi ti baro a CJ.
Ni CJ Peralta ti ponente ti kontrobersiyal a desisyon ti SC a nangipalubos a maitabon iti libingan ng mga bayani ni dati a Presd. Ferdinand Marcos November 2016.
Maipalagip nga idi malem kalman ket pormal nga inapointaran ni Pres. Rodrigo Duterte ni Peralta kas baro a chief justice kasukat ni dati a Chief Justice Lucas Bersamin.
