LAOAG CITY – Kinumpirmaran ni Laoag City Veterinarian Dr. Arthur Cabello a ti laeng Barangay Sta. Rosa ditoy ciudad ti nakaipatungpal ti pannakaigalot dagti amin a taraken nga aso.
Segun kenni Barangay Chairman Roger Balaloa iti nasao a barangay, ti ummuna nga inaramid da ket nangiyuswat da ti outreach session da ken ditoy a gundawayan da a mangilawlawag a nasken ti pannakigalot dagiti taraken da nga aso.
Inbatad na a no adda man ti makita nga agwarang-warang nga aso iti uneg ti barangay ket saanen a taraken dagiti residente no diket aggapo iti kabangibang a barangay.
Daytoy ket gapo ta adda ti dog tag dagiti amin a taraken nga aso dagiti kabarangayan na.
Inlawlawag na nga amin pay a taraken nga aso ken dagiti kaipasngay nga uken ket masapol a maireport wenno mairehistro iti barangay da, kasta pay a no adda ti matay ket maipakammo kadakuada tapno maikkat ti nagan ti aso iti listaan da.
Mainaig iti daytoy, kuna ni Balaloa nga agmulta ti 300 a pisos ti aglabsing iti daytoy ken no adda man ti magakat wenno madesgrasya gapo iti aso ket masapol a tumulong ti akin-taraken.
Kabayatanna, kuna ti kapitan nga idi pannakisalip da iti Search for Rabies Free ket ti barangay da ti maysa kadagiti nangabak baben iti inisiyatibo ken programa ti Provincial Veterinary Office.
