LAOAG CITY – Ipaiman ti Bureau of Fire Protection iti City Engineering Office iti pannakatingiting dagiti nabatbati a paset ti nauram nga establisimiento a nakaapektaran ti siya a pasdek negosyo iti Barangay 16 ditoy ciudad ti Laoag.
Daytoy ti inbatad ni Fire Senior Inspector Edison Reyes, ti firemarshall ditoy ciudad ti Laoag.
Kuna na a ti nasao nga opisina ti mangkita iti structural capabilities ti pasdek no natalged pay a mausar wenno saan.
Segun ken ni Reyes, no saanen a natalged nga usaren ti nabatbati a paset ti nauram nga establisimiento ket kasapulan a marebban babaen ti panangusar ti City Engineering Office kadagiti equipment da.
Mainaig iti daytoy, inpakaammo ni Reyes nga agtultuloy ti isaysayangkat da nga ocular inspection tapno maamoan no ania ti pudno a nangrugyan ti apoy.
Innayon na a ti immuna a nairakurak na a possible a nangrugi ti apoy iti nakasaksak a silaw iti altar ket saan da pay a naan-anay a nakumpirmaran.
Inrakurak pay ni Reyes a nagkiddaw dan kadagiti naapektaran a pasdek negosyo ti listaan para iti presyo dagiti nauram a produkto da tapno maamoan ti pakabuklan a balor dagiti nadadael.
