LAOAG CITY – Nangiyuswat ti Bureau of Fire Protection iti ili ti Pinili ti “Oplan Paalala Iwas Paputok Motorcade” kas paset iti panagsarabo ti baro a tawen ita a 2025.
Daytoy ket indaulan ni Senior Fire Officer 1 Veronica Crisanta magbual, officer in charge iti Bureau of Fire Protection iti ili ti Pinili.
Segun kenkuana, ti naiyuswat a motorcade ket paset ti panag obserbar da iti Oplan Paalala Iwas Paputok 2024 ken dakkel a tulong daytoy kadagiti residente tapno maiwaras a nasayaat ti impormasion no kasano a maliklikan nga agbalin a biktima ti paputok ken pakairamanan dagiti rumbeng nga aramiden.
Inbatad na maibilang daytoy kas maysa a wagas tapno maipalagip iti tunggal maysa iti natalged a panagsarabo iti tawen 2025.
Kabayatanna, kadua ti Bureau of Fire Protection ti Philippine National Police, Municipal Disaster Risk and Management Office ken Rural Health Office a nag-motorcade iti nagduduma a barangay iti ili ti Pinili.
