LAOAG CITY – Saan nga ikkaten ni Presidente Ferdinand Marcos Jr. ti posibilidad a maitantan wenno naan-anay nga agsardeng ti sumagmamano a biahe ti eroplano ditoy pagilian gapu iti kinakurang ti jet fuel gubuay iti tension idiay Middle East.
Inbatad ni Marcos, addan ti sumagmamano a pagilian a saanen a kabaelan nga ag-supply ti fuel kadagiti eroplano ti Pilipinas.
Gapu iti daytoy, mapilpilitan dagiti airline a mangitugot ti umdas a gasolina para iti sibubukel a biahe, agturong ken agsubli.
Ballaag ti Presidente, ad-adda nga agbalin a problema daytoy kadagiti long-haul flights wenno dagiti adayo a biahe.
Mangrugin nga agkissay ti biahe ti sumagmamano nga airline gapu iti nangina a fuel kadagiti dadduma pay a pagilian iti Asya.
Iti Pilipinas, inanunsio ti Cebu Pacific a mangkissay daytoy ti flights mangrugi inton sumaruno a bulan gapu iti agtultuloy a panagngato ti presio ti langis.
Nupay kasta, inrakurak ti Department of Energy (DOE) nga adda ti umdas a suplay ti fuel kadagiti airline ditoy pagilian.
