LAOAG CITY – Inpakaammo ni Dr. Melvin Manuel, mangidadaulo ti City Disaster Risk Reduction and Management Office a bimmassit ti bilang dagiti nagturong kadagiti pagdidigusan ditoy siudad ti Laoag iti Semana Santa ita a tawen no idasig iti napalabas a tawen.
Segun kenkuana, daytoy ket gapu pay laeng iti epekto ti mapaspasaran a krisis iti langis iti intero a pagilian.
Inbatadna a basar met iti nagbalin a panagmonitorda kabayatan ti Semana Santa ket adda ti sumagmamano a disgrasia a napasamak iti paset ti Ablan Avenue kalpasan a naigalis ti naglugananda a behikulo gapu kadagiti tedted ti kandela iti kalsada a nakaisayangkatan ti libot isut gapuna a napukawan dagitoy ti kontrol ti manibela.
Kunana nga awan met ti nagbalin a problema kadagiti nagturong kadagiti simbaan kabayatan ti Semana Santa.
Inlawlawagna nga awan ti naipadamag a nalmes wenno seryoso nga insidente a napasamak kagiddan iti pannakaobserbar ti Semana Santa rason a maibilang daytoy a generally peaceful iti intero a siudad ti Laoag.
Innayonna a daytoy ket babaen ti naiget a pannakikoordinarda iti Philippine National Police, Philippine Coast Guard, Bureau of Fire Protection, Department of Public Safety ken City Health Office.
