LAOAG CITY – Agtultuloy nga umad-adu ti bilang dagiti pagilian a mangalala kadagiti trabahador a Filipino.
Kinuna ni Department of Migrant Workers (DMW) Secretary Hans Leo Cacdac a dandani tinawen nga umad-adu dagiti pagilian a kayatda ti maaddaan iti bilateral labor agreements iti pagilian.
Dadduma kadagitoy ket taga-Europa ken sumagmamano a paset ti Asia gapu ta nakitada ti naidumduma ti kinagaget dagiti Pilipino.
Iti daytoy laeng nga aldaw ti kalayaan, nasurok a 7,000 ti trabaho a naipaay kadagiti Pilipino.
Kabayatanna, dagiti pagilian nga agsapsapul kadagiti trabahador manipud iti pagilan ket pakairamanan ti Australia, Bahrain, Brunei, Cambodia, China, Croatia, Germany, Hungary, Japan, Jordan, Saudi Arabia, New Zealand, Qatar Slovakia, Thailand, United Arab Emirates, Estados Unidos, ken Vanuatu.
