LAOAG CITY – Bimmaban ti bilang dagiti ubbing a Pilipino a saan a bakunado ditoy pagilian basar iti Department of Health (DOH).
Manipud iti dati a sumurok 1 million idi 2020-2021, bimmaba daytoy iti 163,000 idi 2023.
Inladawan ti ahensia ti dakkel a panagbaba iti napaigetan a panagbakuna iti national ken local levels.
Basar iti Department of Health, iti datos idi Pebrero 2025, adda ti sumurok 1.5 milyon nga ubbing nga agtawen ti 0-12 a bulan ti kumpleto ti bakuna.
Iti baet ti panagbaba dagiti saan a nabakunaan nga ubbing, nagballaag ti Department of Health a mabalin nga agsardeng wenno ma-reverse no awan ti agtultuloy a pundo, supply chain support ken political will iti amin ti lebel ti gobierno.
Kagiddan ti panagmarka ti World Immunization Week idi Abril 24 agingga iti 30, mangisayangkat ti Department of Health ti panagbakuna iti Calbayog City idiay Samar no sadinno a sumurok 31 a ribu nga indibidual ti manamnama a mabakunaan.
Makaawat dagiti ubbing nga agtawen ti 0 agingga iti 12 a bulan ti bakuna para iti tuberculosis, polio, pneumonia, measles, mumps, rubella ken pentavalent vaccine.
Naammoan a maibakuna met ti flu ken pneumonia vaccines para kadagiti natataengan idinto a dagiti ubbing a babbai nga agtawen ti siam agingga iti 14 ket maipaayan ti HPV vaccine ken makaawat met dagiti masikog ti tetanus-diphtheria vaccine.
