LAOAG CITY – Binilyon a pisos ti simrek iti bank account ni suspended Bamban, Tarlac Mayor Alice Guo iti uneg ti tallo a tawen wenno manipud iti 2019 agingga 2022.
Inaramid ni Sen. Sherwin Gatchalian ti panangibutaktak kalpasan nga inrakurak ti Anti-Money Laundering Council (AMLC) nga inbilin ti Court of Appeals ti panag-freeze kadagiti bank accounts ken assets ni Guo ken dadduma pay nga indibidual a maipagarup a karaman iti iligal nga aktibidad ti Philippine Offshore Gaming Operations (POGO) ngem saan met a nadakamat no mano ti pakabuklan a balor ti simrek iti accounts ni Guo.
Karaman iti inpa-freeze ti Court of Appeals ti 36 a bank accounts ni Guo, 12 a land holdings, 12 a lugan ken maysa nga helicopter.
Saan a dinakamat ni Gatchalian no aggapu iti China ti dakkel a paset ti kuarta a simrek iti bank account ni Guo.
Inpasigurado ni Gatchalian nga adda ti pagsungbatan dagiti bangko gapu ta dakkel ti nagkuranganda iti saan a panangi-report kadagiti mapagat-atapan a tsansaksion.
Inbutaktak pay ni Gatchalian ti posible nga adda ti panagkunsabo isu a saan a dagus a nai-report iti Anti-Money Laundering Council.
