LAOAG CITY – Dinayaw ti Bureau of Internal Revenue (BIR) ti Ilocos Norte Electric Cooperative (INEC) kalpasan a nagaramid a dagus ti addang tapno masolusyunan dagiti nagtaud a problema iti napalabas nga administrasyon.
Inaramid daytoy ti Bureau of Internal Revenue bayat iti pannakitaripnong da ken ni Mr. Cipriano “Perry” Martinez, ti acting General Manager iti Ilocos Norte Electric Cooperative, no sadinno a nagatendar pay dagiti meter readers iti nasao a kooperatiba.
Kagiddan iti daytoy ket naiyuswat met ti Post Evaluation Activities no sadinno a nailanad ti mission order ti Bureau of Internal Revenue para ita a tawen.
Iti babaen ti mission order ket ibilbilin ti Bureau of Internal Revenue ti naan-anay a panagtungpal ti kooperatiba iti linteg seknan iti operasyon na kas naisaguday iti Section 16, National Internal Revenue code kas iti verification, validation ken dadduma pay.
Mainaig iti daytoy, inpasigurado met ni Martinez iti naan-anay a pannakikooperar da iti Bureau of Internal Revenue tapno maliklikan iti aniaman a problema seknan iti operasyon ti nasao a kooperatiba.
