LAOAG CITY – Inpasingked ni Doctor Evelyn Valdez, Bank Officer iti Bangko Sentral ng Pilipinas (BSP), North Luzon-Regional Office nga awan ti inisyu da a 500 peso bill nga addaan ti ladawan ni dati a President Ferdinand Marcos.
Inlawlawag na nga idi rimuar daytoy a damag ket nangiparuk-at da a dagus ti statement a ti nasao a kwarta ket peke.
Inbatad na a namonganay daytoy a damag iti peke a website iti Visayas region.
Inpetteng ni Valdez a mangiparuk-at laeng ti BSP ti baro a disenyo ti kwarta iti kada 10 a tawen.
Kuna na pay nga adda ti aggapo iti gobierno nga agpili no siasinno kadagiti naglabas a presidente ti maipan iti baro a disenyo ti kwarta ken aprubaran daytoy ti agdama a nakatugaw a presidente ti pagilyan.
Innayon na a no ti disenyo ti kwarta ket adda ti komite da nga agirekomendar.
Innayon na nga iti agdama ket agim-imbestigaren ti binukel a grupo ti BSP a mangtutuk iti daytoy nga isyu.
Mainaig iti daytoy, inbaga ni Valdez a naipagagangayen a no panawen ti eleksyon ket saan a maliklikan nga adda dagiti tumpuar a kastoy nga isyu tapno adda ti pagsasaritaan.
