LAOAG CITY – Suportaran ni Budget Secretary Amenah Pangandaman dagiti economic managers iti panawagan nga i-ban ti Philippine Offshore Gaming Operations (POGOs) iti pagilian.
Inbatad ni Pangandaman a saan a kasapulan ti Pilipinas ti nasao a sektor.
Naammoan a ni Pangandaman ti baro a Cabinet member a nangiyebkas a saan daytoy nga umannugot iti operasion dagiti offshore gambling companies iti pagilian.
Immunan a nangipakita a saanda a suportado ti operasion ti Philippine Offshore Gaming Operations da Finance Secretary Ralph Rector ken Socioeconomic Planning Secretary Arsenio Balisacan.
Inpetteng ni Pangandaman a bassit a gatad laeng ti maal-ala a birok manipud iti Philippine Offshore Gaming Operations a dumanon iti P40 agingga iti P50 billion.
Malaksid kadagiti economic managers, sumagmamano kadagiti agpanpanday linteg ti suportado met ti panawagan nga i-ban ti Philippine Offshore Gaming Operations iti pagilian.
Iti biang met ni House Speaker Ferdinand Martin Romualdez a kasinsin ni Presidente Ferdinand Bongbong Marcos Jr., kunana a kalikagumna ti naiget a law enforcement imbes ti pannakaipatungpal ti total ban kadagiti offshore gaming companies.
