LAOAG CITY – Nasalamaan ti maysa a cargo truck a nagkarga ti kinarkarton a karne manipud Metro Manila bayat a dumalyasat kuma iti border control iti ili ti Badoc.
Segun kenni Mr. Albert Manipol, ti Livestock Inspector iti Provincial Veterinary Office, sinada da ti cargo truck ken inyuswat da ti inspeksyon ngem nakita da ti nabasa a karton.
Inbatad na a ditoy a nakita da a daguiti karton ket naglaon kadagiti processed meat kangrunaan na ti pork ham, sausages, pork shanghai ken dadduma pay.
Inlawlawag na a saan a naibaga a karne ti linaon ti cargo truck apaman a lumabas iti border control.
Gapo iti daytoy, kunana nga intawag da iti opisina da ken inkoordenar da iti City Veterinary Office tapno iti Central Terminal ti naan-anay a pannasukimat ti linaon ti cargo truck.
Mainaig iti daytoy, kuna met ni Dr. Arthur Cabello, ti City Veterinarian ditoy ciudad ti Laoag nga awan ti naipakita a dokumento kas iti travel permit ken dadduma pay.
Kunana pay nga awan ti label ken no anya a kompanya ti nangaramid kadagiti processed meat, ken addan ti madi nga angot dagitoy isut gapo na a mapuuran tapno maliklikan ti posible nga impeksyon.
Inpetteng na a masapol a refrigerated vehicle ti nakailuganan kuma dagiti karne tapno maliklikan a maperdi dagitoy.
Kabayatanna, nagkedked metten a mangipaay ti komento ti consignee wenno ti mangawat kuma kadagiti karne.
Iti agdama ket agtultuloy ti imbestigasyon da seknan iti daytoy a banag.
