LAOAG CITY – Naiget ti koordinasyon ti City Disaster Risk Reduction and Management Office ken dagiti opisyal ti barangay ditoy ciudad ti Laoag gapu iti iduduprak ti Bagyo Nando.
Daytoy ti inpasigurado ni Dr. Melvin Manuel, ti mangidadaulo iti City Disaster Risk Reduction and Management Office ditoy ciudad ti Laoag.
Mainaig iti daytoy, inpakaammo ni Manuel nga adda ti siyam a construction worker a naibakwit iti nataltalged a lugar.
Kuna na a dagiti nadakamat a construction worker ket saanda a residente ditoy ciudad ti Laoag.
Kabayatanna, inpasigurado ni Manuel a nakasagana aminen dagiti equipments ken dagiti response teams para iti dagus a panagresponde da no adda dagiti agkasapulan ti tulong kabayatan ti iduduprak ti bagyo Nando.
Innayon na a karaman kadagiti naka-activate ken naka-standby iti Laoag City Hall ket dagiti kameng ti Philippine National Police, Bureau of Fire Protection, City Health Office, Department of Social Welfare and Development, ken aminen a response team.
Inrakurak pay ni Manuel a naiget ti panagmonmonitor ni Mayor James Bryan Alcid iti agdama a sitwasyon ken mapmapan iti Emergency Operation Center tapno amwen no ania ti pagsayaatan ti intero a ciudad.
