LAOAG CITY – Umad-ado ti bilang dagiti tattao nga agturturong iti City Health Office ditoy ciudad ti Laoag gapo iti panateng, uyek ken gurigor.
Daytoy ti inbatad ni Dr. Rodrigo Catcatan, ti mangidadaulo iti City Health Office ditoy ciudad ti Laoag.
Kuna na a daytoy ket epekto ti panagbalbaliw ti paniempo, manipod iti napudot nagbalin a nalamiis ti panawen.
Mainaig iti daytoy, kuna na adda dagiti nakasagana a supply ti agas nga ipaay ti gobierno lokal kadagiti residente nga agkasapulan.
Inbatad na a rumbeng a mangan kadagiti nasustansya a taraon tapno mapapigsa ti immune system ken narigrigat a makaptan ti aniaman a sakit.
Immunan a nagpalagip ni Cr. Catcatan a masapol a salwadan ti salun-at ita a paskwa kalpasan nga inparuk-at ti Department of Health ti datos a pakakitaan a tunggal Christmas season ket isu ti kaadoan ti mairekrekord dagiti maaddaan ti high blood, diabetes ken sakit ti puso.
Kuna ni Catcatan a daytoy ket mabalin a gapo kadagiti nagduduma a klase ti makan a maidasar no sadinno a kaadoan ket dagiti nalanit wenno natataba.
Innayon na a malaksid kadagiti nalalanit a makan ket mangipaay pay ti risgo iti salun-at ti arak.
Gapo iti daytoy, nagpanawagan a rumbeng nga ammo a kontrolen ti bagi iti pannangan, a ti kasayaatan nga aramiden ket mangala laeng ti pangramanan.
