LAOAG CITY – Inpakaammo ni Atty. Charito Malicad, ti mangidadaulo ti City Tourism Office a maiyur-uray ti report ken recommendation ti City Engineering Office tapno maamoan no ania dagiti kasapulan nga aramiden tapno matarimaan ti watch tower iti Brgy. Gabu ditoy ciudad ti Laoag.
Segun kenni Malicad, sakbay a naidasar daytoy iti Sang Panlungsod ket immunan a naipakaammo iti opisina da isut gapuna a dagus a nakikoordinar daytoy iti City Engineering Office.
Kunana nga insigida dagitoy a nagturong iti Gabu watch tower tapno mangiwayat ti inspection ti nadadael a paset daytoy.
Inbatadna a malaksid iti nakitada a perdisyon ti nasao a watch tower ket naobserbaran da pay adda dagiti ipil-ipil a nagtubo iti unegna a patienna a mabalin a mangitunda iti panagcrack na.
Innayon ni Atty. Malicad a no malpas iti report ken rekomendasyon ti City Engineering Office para iti pannakatarimaan iti gabu watch tower ket maipakaammo a dagus iti National Commission for Culture and the Arts (NCCA).
Inlawlawag pay ni Malicad nga uray adda ti pondo a pangtarimaan iti watch tower ket saan a mabalin a rugyan no awan iti approval ken assistance manipod iti NCCA .
Maipalagip a nadadael ti sumagmamano a paset ti watch tower iti Brgy. Gabu Sur ditoy ciudad gapu iti napasaran a napigsa a ginggined idi Enero ita a tawen.
