LAOAG CITY – Agar-aramid ni Atty. Charito Malicad, mangidadaulo ti City Tourism Office ti wagas tapno ad-adda a pumigsa pay ti “kalesa” ditoy siudad ti Laoag.
Segun kenkuana, iti agdama ket adda laengen sumurok-kumurang 27 a “kalesa” nga agop-operar ditoy siudad.
Inbatadna a basar iti pannakisarsaritana kadagiti kutsero ket rumrummuar a ti kangrunaan a rason no apay a bumasbassit ti bilang dagiti “kalesa” ditoy siudad ket gapu iti kinaawan dagiti agaramid mismo kadagiti “kalesa.”
Mainaig iti daytoy, kuna ni Atty. Malicad nga inpakaammona daytoy a banag ken ni Mayor James Bryan Alcid no sadinno nga insingasing ti Mayor a makikammayetda kadagiti agar-aramid ti “kalesa” idiay siudad ti Vigan.
Inlawlawagna a babaen iti daytoy ket mapagtalinaed ti tradision a pagluganan ken simbolo ditoy siudad ti Laoag.
Innayonna a kalikagumda nga adalen no ayanno ti napintas a pagpuestoan dagitoy.
Kabayatanna, naammoan nga iti agdama ket nakapuesto dagiti “kalesa” iti sangoanan ti maysa a shopping center a mangitunda ti nabangsit nga angot ti isbo ken rugit dagiti kabalyo iti lugar.
