LAOAG CITY – Inadmitir ni Congresswoman France Castro, ti Alliance of Concerned Teachers a nalidem nga agbalin isuna a sumaruno a sekretario ti Department of Education.
Daytoy ket kalpasan nga inrakurak ni Dr. Lorraine Badoy nga ad-adda nga agbalin a kakaasi dagiti estudiante ken mangisursuro ditoy pagilian no ni Congresswoman Castro ti sumaruno a Department of Education Secretary.
Segun ken ni Castro, narigat nga isuna ti agbalin a mangidaulo ti nasao a departamento nangruna ket saanda a nasinged iti babaen ti administrasion ni Presidente Ferdinand Bongbong Marcos Jr.
Inbatadna a masapol nga adda ti natibker a pangibasaran ni Badoy kadagiti ibatbatona nga akusasion kenkuana a saan ketdi a pammerperdi laeng ti ar-aramidenna.
Kunana a nakasagana daytoy a mangipakita ti track record-na kas maysa a mangisursuro ken House of Representative member.
Inpalgakna a no bilang adda ti mangidiaya kenkuana iti panagbalin kas sekretario ti Department of Education iti babaen ti agdama nga administrasion ket saan nga agpangadua nga agkedked daytoy.
Inpettengna a napinpintas no ti sumaruno nga agtugaw iti nasao a posision ket maysa nga educator nga ammona ti maipanggep iti educational system, adda ti kabaelanna a mangsolbar iti educational crisis ken learning gap.
Malaksid iti daytoy, kunana a masapol pay a nasken a ti Department of Education Secretary ket awan ti rekordna iti korupsiyon ken addaan ti integridad.
Kabayatanna, inlawlawag ni Congresswoman Castro nga awan ti ammona ken pakainaiganna ti ibagbaga ni Dr. Badoy maipapan iti Communist Party of the Philippines/New People’s Army/National Democratic Front.
