LAOAG CITY – Dumanon iti 338 nga ektaria a daga para iti contract farming a programa nga inpaay ti National Irrigation Administration kadagiti mannalon iti ili ti Dingras.
Segun ken ni Mr. Danver Dela Cruz, Municipal Agricultural and Fishery Council Officer iti nasao nga ili, dakkel a tulong para kadakuada a mannalon ti indiaya ti National Irrigation Administration a programa kadakuada.
Inbatadna a babaen iti daytoy ket saanda nga aggastos gapu ta ipaay mismo ti nadakamat nga ahensia ti gobierno dagiti kasapulanda iti panagtalon kas kadagiti farm inputs.
Inlawlawagna a ti 30 a ribu a pisos nga inpaay ti ahensia ket isu ti maigatang para iti abono malaksid pay ti ipaayda a 20 a ribu a pisos a cash.
Mainaig iti daytoy, kuna ni Dela Cruz a ti laeng alaen ti National Irrigation Administration kadakuada ket ti lima a tonelada iti maysa nga ektaria.
Kunana a kayatna a saoen, ti sobra ket kukuada a mannalon banag a dakkel a pakalag-anan daytoy iti panagtalonda.
Innayonna a napintas daytoy a programa ti National Irrigation Administration gapu ta saandan a kasapulan pay ti umutang tapno makamula kadagiti produkto agrikultura.
