LAOAG CITY – Natay ti maysa a criminology graduating student kalpasan a maipagarup a pinaltoganna ti bukudna a bagi iti Barangay Mariquet iti ili ti Solsona.
Segun ken ni P/Capt. Randy Damo, Hepe ti Solsona Municipal Police Station, ti biktima ket maysa a lalaki, agtawen ti 22 ken residente iti nasao a barangay.
Inbatadna nga apaman a simmangpet dagiti otoridad ket nakitada ti biktima iti kuarto iti maikadua a kadsaaran ti pagtaengan nga awan ti puotna ken dara-dara ti ulona kabayatan nga ar-arakupen ti ina ti anakna.
Inlawlawagna a naitaray iti Rural Health Unit ti biktima ngem naideklarar a pimmusay kabayatan a matamtaming.
Kunana nga adda ti maysa a tama ti paltog iti ulo ti biktima a simmalpot iti bangir a paset ti ulona a nangitunda ti pannakatayna.
Inpettengna a kadagiti naglabas nga aldaw ket masdaaw dagiti nagannak ti biktima no apay a saan nga agisusuot ti uniporme ti anakda iti baet a manarimaan ti On the Job Training dagiti kaklase daytoy.
Gapu iti daytoy, nagturong dagiti nagannak ti biktima iti pagad-adalanna a Data Center College of the Philippines no sadinno a ditoy a naammoanda a nabagsak ti anakda ken saan a karaman kadagiti agturpos ita a tawen.
Mainaig iti daytoy, rumrummuar a na-depressed ti biktima idi naammoan dagiti nagannak daytoy ti pudno nga estado iti panagadalna.
Inpaganetget ni P/Capt. Damo a basar iti ama ti biktima a calibre 22 a paltog ti inusar iti maipagarup a panagpakamatay ti anakna no sadinno a nabayagna daytoyen nga iduldulin iti kuartona ngem saanna a masinunuo no apay a nabirukan ti anakna.
Innayonna a daytoy ti umuna a gundaway a ginandat ti biktima a kettelen ti biagna.
