LAOAG CITY – Saan a pabor ti City Social Welfare and Development Office ditoy siudad ti Laoag iti pannakaipababa ti tawen dagiti ubbing a makaswan no aglabsing da iti paglintegan ditoy pagilian.
Daytoy ti inbatad ni Mrs. Perlita Cabello, Social Welfare III iti children section ti CSWDO kalpasan a naipasa iti House Panel ti gakat a pannakaipababa agginga iti tawen ti siyam ti criminal liability.
Kuna na a dakkel ti epekto iti panagdakkel dagiti ubbing no mapilaan da iti kaso.
Segun kenni Mrs. Cabello, maapektaran iti dignidad ti ubing ken mabalin a managbutbuteng dagitoy kadagiti tattao ken mabalin a saan a makabasa.
Mainaig iti daytoy, inpakaammo na a bumabbaba ti bilang dagiti reklamo maipanggep kadagiti ubbing a makaar-aramid ti saan a nasayaat kangrunaan kadagiti menor de edad a mapilpilaan ti kaso.
