LAOAG CITY – Addan ditoy Ilocos Norte ni dati a Mayor iti ili ti Dingras a ni Marynette Gamboa kalpasan a natiliw idiay Quezon City idi rabii gapo iti sangsangwen na a kaso a murder.
Apaman a nakasangpet iti Laoag International Airport ket inpangato na dagiti nakaposas nga ima na ken kunana a saan a mabalin a mangipakita gapo ta kalikagom na a magun-od ti hustisya iti pannakatiliw na.
Naamoan a nakaposas ti dati nga opisyal bayat a nakalugan iti eroplano ken kinadwa ti anak na a ni Tiffany Gamboa ken ti manugang na kabayatan ti panagsubli na ditoy probinsya.
Iti agdama ket adda iti kustudiyar ti INPPO ni Gamboa sakbay a maiprensentar iti korte a naggapoan ti warrant of arrest.
Maipalagip a natiliw ni Gamboa babaen ti bileg ti warrant of arrest nga inparuk-at ni Judge Philip Salvador iti Regional Trial Court Branch 17 idiay ciudad ti Batac.
Namunganay ti kaso kontra kenni Gamboa iti pannakatay ni NEC Board President Lorenzo Rey Ruiz idi Setyembre 4, 2009 bayat nga adda iti INEC Substation idiay Lang-ayan iti ili ti Currimao.
