LAOAG CITY – Nalidem a patgan ti International Criminal Court (ICC) ti kiddaw ni dati a Presidente Rodrigo Duterte para iti “interim release” wenno judicial order para iti pannakawaya-waya na manipod iti kustodyar da sakbay ti trial.
Inlawlawag ni Atty. Joel Butuyan, International Criminal Court-accredited lawyer ken chairperson ti Center for International Law a marigatan a makaala ti dati a presidente ti interim release kangrunaan na ket flight risk daytoy wenno possible nga aglibas ti pagilian sakbay pay ti trial.
Kuna na a no mapalubusan ti dati a presidente a mawaya-wayaan,mabalin nga agkedked daytoyen nga agsubli iti pannakausig na iti korte.
Innayon na nga adda pay ti posibilidad a mabuteng ken makapungtot dagiti testigo ken maaddaan ti depekto dagiti ebidensiya kontra kenkuana.
Inlawlawag pay ni Atty. Butuyan marigatan ti kampo ti dati a Presidente a makaala ti interim release no ti pagibasaran laeng ket ti salun-at ni Duterte gapu ta adda met ti independent medical verification nga aramiden ti International Criminal Court.
Maiyuswat ti pre-trial hearing iti kaso ni dati a Presidente Duterte intono Setyembre 23 ita a tawen a mangtutuk iti kumpirmasyon dagiti kaso.
