LAOAG CITY – Nagkedkedan ti Sandiganbayan Third Division ti kiddaw ni dati a Senador Ramon “Bong” Revilla Jr. a temporaryo a makaruwar iti pagbaludan tapno mapan iti mansayag ti pimmusay a kabsat na iti ama.
Iti tallo a pinanid a resolusyon, inbatad ti anti-graft court a nupay maysa a personal a trahedya ti pannakapukaw ti maysa a kabsat, ngem ti rason ni Revilla ket saan nga immabot iti level ti exceptional ground a kasapulan ti korte.
Dinakamat ni Revilla ti pimmusay a kabsat na a ni Jojo Bautista, a nakamansayag iti Angelus Eternal Garden Chapel iti Imus, Cavite.
Agdama a nakabalud ni Revilla iti Quezon City Jail Male Dormitory iti Payatas mainaig iti nakapenpen a kaso a malversation kontra kenkuana ken lima pay nga akusado mainaig iti maipagarop a P92.8 milyon a proyekto iti flood control iti Pandi, Bulacan.
