LAOAG CITY – Temporaryo a nawaya-wayaan ni dati a Senador Ramon “Bong” Revilla Jr. kalpasan a nakapagpiyansa ti P1-milyon a pisos iti Sandiganbayan.
Nakapagpiyansa ni Revilla kalpasan a pinatgan ti anti-graft court ti inpila na a petition for bail iti kaso na a malversation mainaig paylaeng iti pannakairaman na iti maipagarop a maanomalya a flood control project.
Ti madakdakamat a proyekto iti kaso ni Revilla ket ti napondoan ti P92.8-million iti Pandi, Bulacan, ngem naduktalan nga awan pulos ti naipatakder iti lugar.
Mainaig iti daytoy, kinumpirmaran ti Bureau of Jail Management and Penology (BJMP) a nawaya-wayaan ni Revilla manipod iti Quezon City Jail Male Dormitory iti Payatas iti oras ti alas-6:14 ti rabii ita nga aldaw ti biernes, Hulyo 31 babaen ti pammilin nga inisyu ti Sandiganbayan Third Division.
Basar iti desisyon ti korte, pinalubusan da nga agpiyansa ni Revilla gapu ta napaay ti prosekusyon a mangipakita ti natibker nga ebidensya kontra iti kaso ti dati a senador.
