LAOAG CITY – Padayawan ti Department of Environment and Natural Resources wenno DENR ditoy rehion uno dagiti kangrunaan a tumultulong kadakuada iti pannakatagiben ti aglawlaw iti Search for Best Environmental Partner.
Inlawlawag ni Engr. Pedro “Pete” Agcaoili Jr., Officer In-Charge iti Environment and Natural Resources Office a nainuminar ti gobierno probinsial a maipaayan ti pammadayaw babaen ken ni Provincial Environment and Natural Resources Officer Victor Dabalos.
Mainaig iti daytoy, inbatadna nga adda dagiti pannakabagi ti Department of Environment and Natural Resources ti rehion uno nga immay nang-evaluate kadagiti naaramidan ti probinsia iti pannakatagiben ti aglawlaw.
Inlawlawagna a karaman kadagiti inbinsabinsana dagiti aktibidad ti probinsia iti babaen ti liderato ni Gob. Matthew Marcos Manotoc iti pannakapreserbar ti aglawlaw nangnangruna idi bulan ti Marso ken Abril a kaadu dagiti napasamak a “forest fire” ken “grass fire.”
Mangnamnama ni Agcaoili nga adda ti maawat ti probinsia a pammadayaw gapu ta addan dagiti nangtawag kenkuana a mangipadpadanon iti panangkablaaw da iti gobierno probinsial.
Segun kenkuana, naipakaammo kenkuana a maisayangkat ti “awarding” ita a bulan iti Hulio.
Nupay kasta, saanna pay a masinunuo no asino ti mapan mangawat iti pammadayaw para iti probinsia no ti gobernador wenno adda ti pusganna nga opisial ti probinsia a mapan mangawat iti nasao a pammadayaw.
