LAOAG CITY – Inbatad ti Department of Education (DepEd) a nagtalinaed nga isolated cases ti pammaltog iti maysa a pagadalan iti Tacloban City ken dadduma pay nga insidente kadagiti pagadalan iti kallabes.
Segun ken ni Department of Education Undersecretary Malcolm Garma, saan a tagibassiten ti ahensya dagiti pasamak, ngem awan pay ti indikasyon na nga agraira wenno nalawa a kastoy ti klase na a kinadamsak kadagiti pagadalan.
Nupay kasta, bigbigen na ti panagkaspaulan ti naig-iget a pannakaipatungpal dagiti school safety measures ken papigsaen ti koordinasyon dagiti nagannak ken komunidad.
Kalpasan ti pammaltog iti Tacloban City a nakatayan ti tallo nga estudyante ken nakasugatan ti 20 a sabsabali, kuna ti Department of Education nga irebrebisar da ti pannakaipatungpal dagiti pagannurutan iti pagadalan.
Karaman kadagiti addang ti panagusar ti Closed Circuit Television (CCTV) camera, panagikabil ti security guards, random bag inspections, ken metal detectors kadagiti pagadalan.
Dinakamat pay ti Department of Education nga adda ti maipatpatungpal a guidelines iti school safety iti babaen ti DepEd Order No. 6, Series of 2026, ngem ti karit iti agdama ket no kasanu a paigetan pay ti pannakaipatungpa dagitoy iti kada pagadalan.
Kabayatanna, agtultuloy ti panangipaay ti psychosocial support kadagiti biktima, mangisursuro ken agad-adal a naapektaran ti insidente iti Tacloban.
