LAOAG CITY – Naragsakan ti Department of Justice (DOJ) ti rakurak ti Indonesia a respetarenda ti posible a panangipaay ti clemency iti death row convict a ni Mary Jane Veloso.
Nupay kasta, inbatad ni Justice spokesperson Mico Clavano a nakadepende latta ken ni Presidente Ferdinand Marcos Jr. no ipaayanna ti clemency ni Veloso.
Inlawlawagna nga adda iti Konstitusion a ti Presidente laeng ti addaan ti prerogative a mangipaay ti executive clemency iti asinoman a person deprived of liberty.
Kunana nga ad-adalen a naimbag ti Presidente ti amin nga aspeto a kasapulan a mabalanse kas ti apela ti pamilia ken ti nagbalin a desision ken ni Veloso iti Indonesia.
Immunan nga inbatad ni Indonesian senior minister for law and human rights affairs Yusril Ihza Mahendra nga addan iti ima ti Pilipinas ti desision iti agbalin a dana ni Veloso.
Manamnama a makaawid ti Pilipinas ni Veloso sakbay nga agpaskua.
Kabayatanna, naammoan a da Justice Undersecretary Raul Vasquez ken dadduma pay nga opisial ket adda idiay Indonesia tapno mapagsasaritaan ti detalye iti panagsubli ni Veloso.
