LAOAG CITY – Mabalin nga agturong iti sabali nga ospital dagiti pasiente a nakapasar ti leptospirosis ken saanen a makiselsel iti National Kidney and Transplant Institute (NKTI) ken San Lazaro Hospital, maibasar iti Department of Health (DOH).
Inbatad ni Department of Health spokesperson Assistant Secretary Albert Domingo a kabaelan dagiti ospital a tamingen dagiti pasiente ti leptospirosis ken iyus-uswatda met ti dialysis.
Inbatadna a saan a kasapulan a kanayon nga itaray iti National Kidney and Transplant Institute ti pasiente iti baet a mabigbigbig ti ospital ken dagiti espesialista iti kidney.
Inabisoanna kadagiti makarikna ti sintomas nga agturong pay laeng nga umuna kadagiti health center tapno maduktalan no ania a klase ti sakit ti kimmapet kadakuada sakbay a mapan iti ospital.
Iti kaudian a datos, dumanon iti 70 ti na-admit iti National Kidney and Transplant Institute.
Daytoy ket gapu met laeng iti kiddaw ti National Kidney and Transplant Institute a nayonan dagiti nurses ti 20 ken 10 pay a medical doctors banag a naaramid met ti Department of Health hospitals ken Philippine Red Cross.
Kabayatanna, manamnama a ngumato pay ti bilang gapu ta posible a dumanon iti maysa a bulan ti incubation period ti leptospirosis.
