LAOAG CITY – Inrakurak ti Department of Health (DOH) nga inpangaton ti Philhealth ti benepisio nga ipapaayna kadagiti pasiente nga addaan ti dengue.
Iti abiso ti Department of Health, ti dati a P10,000 nga ipapaay kadagiti addaan ti dengue fever ket naipangaton iti P19,000.
Naammoan a dagiti severe dengue met ket makaawat ti P47,000 manipud iti dati a P16,000.
Gapu iti daytoy, immapela ti Department of Health ken PhilHealth kadagiti addaan ti dengue a saan a baybay-an a kumaro ti sakit ken insigida nga agturong iti ospital.
Kabayatanna, dagiti makapaspasar ti sintomas ket insigida nga agpakonsultar ken awan ti pagdanagan gapu ta ibaklayen ti PhilHealth ti panagpaagas dagitoy.
