LAOAG CITY – Kalikagum ti Department of Health (DOH) ti panagpabakuna ti Human Papillomavirus (HPV) iti agarup maysa a milyon a Grade 4 nga estudiante manipud kadagiti pampubliko a pagadalan pakairamanan dagiti dadduma pay nga estudiante manipud kadagiti pribado a pagadalan ditoy pagilian.
Inbatad ni Department of Health (DOH) Secretary Teodoro Herbosa, plano ti ahensia a mangrugi ti rollout ti bakuna iti pannakibinnuligda iti Department of Education (DepEd) inton maikadua a kuarter ti 2025.
Inlawlawagna a sipod idi Enero 6, sumurok kagudua a milyon nga agad-adal manipud iti Grade 4 ti nakaawaten ti umuna a dose ti Human Papillomavirus vaccine iti babaen ti school-based immunization program-da.
Kabayatanna, iti datos ti International Agency for Research on Cancer ti World Health Organization (WHO) dumanonen iti 8,549 dagiti babbai a Filipino ti naapektaran ti cervical cancer ken kagudua ditoy ket pimmusay idi 2022.
